Solu zeimis Cyblys nūvodā

Latgolā irā cyta, sovpateiga adresacejis tradiceja – pa solom aba dzerauņom, a Baļtejā (Vydzemī i Kūrzemī) – pa sātom aba kuturim. Dīvamžāļ, da šam opicialai Latvejis Republikā ituos izškireibys 30 godus ignorieja, zemis repormys laikā izmīgdami Latgolys sātom jom nakaraktereigys, muoksleigai izdūmuotys pasaukšonys, kurys realai tautys volūdā nalītoj, a solu pasaukšonys, kurys tautā lītoj, nu publiskuo apryta izjēme. Niule Latvejis Republika kūrsu irā izmejuse, nu ministreju īt aicynovumi vaira lītuot latgalīšu rokstu volūdu, byus pījimts viesturyskūs zemu lykums, partū itymā jaunajā kūrsā cīši labi īsaroksta i ituo projekta iniciativa.

   Itūšaļt iz Latgolys ceļu irā tik nūruodis ar leluokūs apdzeivuotūs vītu pasaukšonom, bet mozuos dzeraunis aba solys deļ celinīku kaiba i vysā naeksistej: jī tik radz nazcik vīnuvīt asūšys sātys, bet pasaukšonu naradz. Ka pa ceļam kursej sabīdryskais transports, tūlaik irā vareiba, ka solys pasaukšona redzēsīs pīturys zeimē, tok i jei byus puordareita baļtīšu volūdā, bīžai – nabarāgā pormā. Partū cīši svareigai izvītuot inpormativys zeimis ar pasaukšonom jūs originalā – vītejā latgalīšu volūdys vītrunā, kab i vītejī bārni, i tyvuoki, i tuoleimuoki gosti i daža carbraucieji automatiskai sajimtu inpormaceju ap attīceigū vītu i juos viesturiskū pasaukšonu.

   Taidys nūruodis paleidzēs saglobuot vītejū kuļturys montuojumu (kam pasaukšonys irā juo sastuovdale), a taipoš „pona režimā“ apvuiceit daudzejus cylvākus – i vītejūs, i gostus.

    Projektu realizej bīdreiba LVC (Latgalīšu volūdys centris), pinaņsej bīdreiba LR (Latgolys radeja) i Cyblys nūvoda pošvolds. Projektu voda Aņss Ataols Bierzeņš. Projektu realizej taišni Cyblys nūvodā, kam jū da pārnejuo gods vadeja vīns nu latgaliskuokūs Latgolys pošvoldu dareituoju – Dombrouska Jurs, kurs atsasauce iz bīdreibu iniciativys i pīduovuojuma.

    Projekta snāgs irā viesturiskūs solu pasaukšonu aktualiziešona, propuļšonys i iznykšonys napīļaušona, vītejuo kuļturys montuojuma publiska eksponiešona.

   Projekta aizdavums irā metala nūruožu ar viesturiskajom pasaukšonom (boļti literi iz bryuna pona) izvītuošona pi Cyblys nūvoda vysu pīcu pogostu 33 solu iz vītejuos nūzeimis pošvolda ceļu:

Blontu pogostā: Lelajā Medišovā, Sylagaiļūs, Vonogūs, Čodarānūs, Skradeļūs, Ožuorgūs;

Cyblys pogostā: Barysūs, Kaļveišūs, Luopstūs, Morozoukā, Stuocynovā, Vacumnīkūs;

Zabalocis pogostā: Bārtuļūs, Berozoukā, Čižykūs, Platpirovā, Klešnikūs;

Pušnicovys pogostā: Latyšūs, Sļapņajūs, Snuotyuļūs, Staupinē, Stepuonūs, Iudrūs;

Zviergzdiņa pogostā: Lelajūs Lītaunīkūs, Mozajūs Trukšanūs, Krystužānūs, Krīveņūs, Ziciškūs, Bierzinīkūs, Rudzeišūs, Teiruma Kockūs, Bolūžovā i Ražanovā.

   Turēsim nūceji, ka itei dzela nanūstuos i iz prīšku pastateisim zeimis i pi cytu dzerauņu vysā jaunajā Ludzys nūvodā!

Aņss Ataols Bierzeņš,

bīdreiba Latgalīšu volūdys centris

Uz augšu